Инсан хъуьреда, гьайван хъуьредач,
Инсанар шехьда, шехьдач гьайванар.
Фитне-къаргъишни гьайванрихъ жедач,
Жедач инсанрив жедай дуванар.
Ингье кьеб вилик ква зи лап куьгьне,
Кьве вишелайни артух я яшар.
Зунни хьайиди я адан къене,
Зани авуна гьисс адан тангар.
Гьа тангари заз ачухна цавар,
Ачухна рекьер уьмуьрдин четин.
Йифериз ийиз туна зав ахвар,
Йикъар атайла авуна секин.
Зун вахъ галкIана, зи къуллугъ багьа,
Гьеле на авур са затIни авач.
Къекъвезва зун, зи кьил кьуна цава,
Накьвадихъни гьич галукь тийиз кIвач.
Аял хъуьрейла кьепIина гъвечIи,
Заз дагъларин син хъуьрей хьиз жеда.
Я им сад лагьай аял кIани чи,
КIвалера ракъар куькIвей хьиз жеда.
АцIай хьиз жеда рамагрив чIафар,
Лапагрив чIехи яйлахар, сувар.
Сарубугъдадин паласада твар
АцIай хьиз жеда, кьилеллаз шагьвар.
Рахазва булах йифди куш-кушиз,
Вич-вичихъ галаз, дагъларихъ галаз.
Вичин къайивал авахьзавай циз
Гуз, физ гьазур я ам гзаф яргъаз.
Какахьиз фена дили вацIарик,
Анайни фена гьуьлуьк какахьиз.
Йиферизни кваз физвач ахвариз,
Накьандалай къе зарбдиз авахьиз.
Вуч лугьузва далдамдини зуьрнеди,
Экуьнахъ фад кьакьан къавал акьахна,
Ван чукIуриз Къубадизни Куьредиз,
Кьулан вацIун экуьн ванцик какахьна?
Вал тIвар дидеди вичи эцигна,
Ви иервилиз, михьивилиз ви,
Кьегьалвилиз ви, чиниз килигна,
Килигна рикIин чIехивилиз ви.
Гьакьда дуьньяяр ви рикIе чIехи,
Дердерни гъамар алакьдай эхиз.
Хьанвай къад йисни тахьанмаз рехи,
Амма такур гьич садрани шехьиз.
КУЬРЕ ПАТА:
Асиятан жалоба.
Зун яшамиш хьана сифте хуьре зи,
Булахрай яд хъвана, зверна яйлахрай.
За гьамиша жув тухвана жуьре зи,
Хьана вик1егь ана вири к1валахра.
Зун ацукьнавай тарцин к1ане тек,
Экуьн кьилелай михьи гьава нез.
Гьа и арада атана са пехъ,
Башламишна зи винелай элкъвез.
Килигайт1а зун а тарцин кук1ва,
Зал элкъвезвай а пехърен муг авай.
Хкаж жезвай са кац тарциз зурба,
Мукув агакьиз т1имил кьван амай.
