Перейти к основному содержанию

Вуж хьун хъсан я?

Инсан хъуьреда, гьайван хъуьредач,
Инсанар шехьда, шехьдач гьайванар.
Фитне-къаргъишни гьайванрихъ жедач,
Жедач инсанрив жедай дуванар.

Амма хъуьремир лугьузва чаз къе,
Хъуьредай гьалдиз гъанвай хуьрни кIвал.
Шехьмир лугьузва, еке са уьлкве
БарбатI авуна, туна рикIе тIал.

Хьухь куьн гьайванар, лугьузва, вири,
Шехьдай чкадал шехьни тежедай,
Низ герек я куь уьмуьрдин ери,
Низ герек я кам куьне вегьедай.

Гьа акваз-акваз тарашна кIватIай
Девлетар чIехи уьлкведа гьарда,
Кьудкъанни цIувад, рехв хьиз яд атIай,
Ама, юкьвал кьван гьатна кьарада.

Я хъуьрез жезмач, я жезмач шехьиз,
Низ герек я ви гьарайни эвер,
Миллионри къе, ихьтин гьал эхиз,
Фадлай рикIелай алуднава хъвер.

Гила, куьне лагь, ихьтин девирда
Инсан хьун хъсан яни, тахьайтIа,
ЗатIни авачир вичин фикирда,
Жанавур вагьши, недай гьатайтIа?

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.