Вуч лугьузва...

Вуч лугьузва далдамдини зуьрнеди,
Экуьнахъ фад кьакьан къавал акьахна,
Ван чукIуриз Къубадизни Куьредиз,
Кьулан вацIун экуьн ванцик какахьна?

Лугьузва хьи, кьве жегьилни Ватандиз
Вафалу я, герек атай береда
Хуьдай адан тереф жуван виждандив,
Лезги халис къагьримандин жуьреда.

Лугьузва хьи, абурухъ жедай балаяр
Космонавтар жеда, фидай цавариз,
Алуддайбур чалай бела-къазаяр
Хайи чилел душман къведай чIавариз.

Лугьуда хьи, чи чилерин никIера
Жеда бегьер, хъуьредайвал лежберар.
Багъларани гьар са тарцин хилерал
Ичер яру, жумар хъипи, чуьхверар.

Лугьузва хьи, мад мехъерни мел жеда,
Мад кIваче звер жеда гьар са инсандин.
Гьар са хипен гуьгъуьна са кIел жеда,
Гуьгъуьна тай жеда гьар са балкIандин.

Пакадин югъ чаз хушдаказ хъуьреда,
КIанзавайди гьа им я гьар са касдиз.
Яшамиш жез азаддаказ дуьньяда,
Нефес къачуз гьар са касди азаддиз...

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.