Куьчхуьр Саид

Са пенкьв кьванни гьатначни квез, инсанар?
Гьинай гьатна квез и душман къарагуьн?
Вилаятда туна тапан дуванар,
Бес мус жеда са гьакь-дуван, къарагуьн?

Эй, залум ц|ай, залай алат,
Эхиз тежер гуж хьана заз!
Яхул шалдин лацу халат
Ивидай жер гуж хьана заз.

Набелед яз кьунач хабар:
Ц|вена кьилел дагълар, рагар.
Кьилел атун акур ахвар-
Агь, бешбетер гуж хьана заз.

Первердигар, сагъ чан, фу чаз кьегьят я,
К|евяй халкьдин душман акъат тавурай!
Аллагьдин бурж вахкун гена регьят я,
Ви буржуник чун, хан, акат тавурай!

Залум уьмуьр, зун шаднач ви бегьерди:
Я сад аллагь, им вуч дуван хьана заз?
Незвай фуни эвезна заз зегьерди:
Экуьникай магьрум иман хьана заз.

Мусалай къе раханва к|ек.
Цуьк алай ч|ур аквазмач заз.
Белки, ачух хьанват|а экв?
Хуьр алай хур аквазмач заз.

Гъил экъуьрна жагъурна саз.
Гьатзавач хьи тезенаг заз.
Ядай за са дертлу аваз:
Симерин нур аквазмач заз.

Вун иблис я, шейтIан я вун гунагькар,
Чиркин я руьгь, туькьуьл я мез ви, агъа.
Кесиб саймиш тийиз, гьилле я ви кар,
Аквадач вун гьич дуьз рекьяй къвез, агъа.

Авайвилиз хьурай лянет, кур байкъуш,
Ви а мурдар суфат низ хьуй бес къе хуш?
Гъилер, беден ивид курут, келле буш,
Бес мус жеда са гьакь-дуван, къарагъун?

Гьикьван вахт тир вил галамаз вун акунихъ?
Гьатнавай чун ви дердина, чубарук!
Сим гъуьргъуь яз чуьнгуьр галай хкунихъ.
Авайди кьуьд тир вирина, чубарук.

Чи вил галай вахъ, гена вун хтана.
Чи айванар ви манидив ацIана.
Сегьер-сегьер вун заз акваз датIана,

Жегьил чандиз азаб гумир вуна зи:
Яб гузмач хьи на имандиз, валлагь, къе.
Хажалатди жигер кана, суна, зи,
Дава, дарман авач чандиз, валлагь, къе.

Зун фикириз месин кьиле ацукьна:
Яраб зи дерт хабар я ваз, Фарман дуст?
Ялвардин сес зи туьтуьна амукьна:
Нив рахада, дертлу я зун, я чан дуст!