Залум уьмуьр, зун шаднач ви бегьерди:
Я сад аллагь, им вуч дуван хьана заз?
Незвай фуни эвезна заз зегьерди:
Экуьникай магьрум иман хьана заз.
Гьатна ягъи хуьрера хан лугьудай.
Зиллетдин кьил къалурзава къапудай.
Уьмуьраллагь хиве аваз тухудай,
Т|емни акакь тийидай къан хьана заз.
Гурай вичиз рик|ин т|ал эх тежедай.
Пили ят|а къе эллериз кич|едай,
Пака аюх хьуй вич эллер хъуьредай.
Алукьзамай югъ къе аян хьана заз.
Чидайди туш адаз ч|ехи-гъвеч|иди,
Бинедилай- халкь хьайи- я пехъиди.
Ч|улав хвех хьиз, ч|улав кьилни рехиди
Хьанвалда зи-гьа ихьтин ван хьана заз.
Кьуьчхуьр Саид, вуна гьидаз минетда?
Гьар залумдин эхир жеда, гьелбетда.
Наши киц|из жува ат|ай къиметда
Аквадани гъейри гиман хьана заз?
Рубрика
Добавить комментарий