Зарияр

Зурба ватанперес ашукь ва шаир Лезги Эгьмед (1762-1840) тахминан XVIII виш йисан кьвед лагьай паюна виликан Къуба уезддин (гилан Къусар район) Вурварин хуьре лежбердин хизанда дидедиз хьана. Лезги Эгьмед дуьньяда къекъвей, гьа девирдин гьар са кардикай хабардар, халкьдиз къуллугъ авур шаир тир.

Саид Агьмед (XVIII асир) вичин девирдин чирвилер авай шаиррикай тир. И шаирдин шиирар халкьдин дерин къатара машгьур хьанвай. Саид Агьмед гъурбатда кечмиш хьана.

Акимов Къ. Х. «Лезги зарияр»

Цилингви БукIа (Абукар) лезги халкьдин чIехи шаир Етим Эминан ата-буба я. Ам XVIII асирдин сифте паюна, тахминан 1705-1760-йисара яшамиш хьана. Чал Цилинг БукIадин са кьадар эсерар агакьнава.

Акимов Къ. Х. «Лезги зарияр»

Лезгийрин зурба шаир Саид Куьчхуьррин хуьре (гилан Кьурагь район) 1767-йисуз лежбердин хизанда дидедиз хьана. Саида медресада кIел-кхьин чирнай, амма фад етим хьун себеб яз адавай медреса куьтягьиз хьанач.

Бажарагълу шаир Мазали Али виликан Самур округдин (гилан Ахцегь район) Мацарин хуьре 1850-йисуз дидедиз хьана. Ада кIел-кхьин хуьруьн медресада чирна. Вичихъ дерин кьатIунар ва хци зигьин авай гададивай кIелун давамариз хьанач. Ада чубанвал ва лежбервал ийиз хизан хуьзва.

ЧIехи алим, шаир ва камалэгьли, Дагъустандин халкьар азадвилин женгериз къарагъарай регьбер Ярагъ Мегьамед 1770-йисуз Куьре магьалдин Вини Ярагъ хуьре дидедиз хьана.

ЧIехи алим, шаир ва арифдар Мирзе Али 1770-йисуз Ахцегьа  дидедиз хьана. Хци зигьин авай жегьилди Ахцегьрин, Араканидин  ва маса медресайра кIелна, диндин ватIебии илимар, РагъэкъечIдай патан араб, фарс ва туьрк чIалар чирна.