Кесиб Абдуллагь

Дуьньяда

Гаф лагьайла, атIузва чи виликай,
Амач эллер гьахъни дуван дуьньяда.
Уьмуьр бада азад са югъ такуна,
Рекьидани бес чун жуван дуьньяда?

Зулун марф

КiватIна кьилел цавун цифер чIуп-чIулав,
ХъуьтIуьн къайи марф гала вахъ, зулун марф,
Вил экъисиз, чинар чIуриз, гьарайиз
Хажалатдин пар гала вахъ, зулун марф!

Туьрез

Кьве яц кутIунна какур карасдихъ
Кiуф чиле туна физ аван, туьрез?
Кесибдин рикIе авай дертни-гъам
Гьикьван чIехид я – чиз аван, туьрез?

Кьама акьурла юзбашидин гъуд,
Садан еринда вугузва са цIуд.
Аман-минет хьуй, вун я зи умуд,
Балайриз суьрсет гъиз аван, туьрез?

Экуь дуьнья

Са югъ таквар вучда вакай
БарбатI хьанва экуь дуьнья.
Марф акьуна ктIай цил хьиз
КьатI-кьатI хьанва экуь дуьнья.

И вав гвайди гьич инсаф туш
Даим кьилел алай байкъуш.
Намуслуди амачир, буш
Са затI хьанва экуь дуьнья.