Саид Ибрагьимов

В-диз

ЧIагай чIалар кхьена чи Эмина.
Расулани са вуч ятIа лагьана.
Зазни лугьур са кьвед-пуд гаф жагъана,
Яб акална мана хкуд, кIаниди.

Гьахъ яни вун зун саймишни тавунал?
Гьалтай чIавуз килигиз вун шакунал?
Рази я тек ширин мецел рахунал,
Маса лезет заз герек туш, кIаниди.

Ша, руш, ша!

Ахмакьвал я гьуьжет авун,
Вун гуьрчег туш, лагьана.
Муьгьуьббатдин цIийи къанун
Зи уьмуьрдиз на гъана.

Рекьизвайдаз гьевес гъизва
Хурудаллай ципIери.
Садан руьгьни секин тазвач
Кьакьан гуьзел кIвачери.

Гьинава вун?!

Са вядеда зун жегьил тир звер алай,
Ганай на заз муьгьуьббатдин туьнт буза.
Гьинава вун?! Гилани вахъ вил гала,
Таниш я, руш, хам чандиз зи нуш суза.