В-диз

ЧIагай чIалар кхьена чи Эмина.
Расулани са вуч ятIа лагьана.
Зазни лугьур са кьвед-пуд гаф жагъана,
Яб акална мана хкуд, кIаниди.

Гьахъ яни вун зун саймишни тавунал?
Гьалтай чIавуз килигиз вун шакунал?
Рази я тек ширин мецел рахунал,
Маса лезет заз герек туш, кIаниди.

Эхь, гьелбетда, гаф авач ви абурдиз.
ТабзаватIа, рикI кьисмет хьуй гапурдиз,
Ухшар мийир вуна зи рикI къавурдиз,
Зи мурадриз кьецI гуналди, кIаниди.

Куьруьди я, чир хьухь, уьмуьр чаз гузвай,
ПичIибур туш и гафар за лугьузвай.
Бахтуникай, гъилералди къачузвай,
Фикир тийиз, катзава вун кIаниди.

Арадава тафават чи яшарин,
Кьамир багьна гьадакай на, чан ширин.
Муьгьуьббатдин цIаю такай ксарин
Келлейра хьуй а буш фикир, кIаниди.

Куьгьне я зун килигайла акуниз,
Ам беден я, давам ганвай вахтуниз.
Куьз килигда вун зи ханвай жугъуниз,
Ад къеневай цуьквер аку, кIаниди...