Фад хьайи кар

ЭкъечIнавай беневша дуьз дугуна,
Хак акъатай рагъул ламраз акуна,
Гуьлдихъ авай шадвални нур такуна,
Ламра адан атирлу кьил атIана.

Цуьк йигъазвай, гвачир зере фашалвал,
Шад уьмуьрдихъ лап кьадарсуз нефс авай.
Квез герек тир ламраз адан гуьзелвал,
Адахъ вичин гьайванвилин кеф авай.

Гьа цуьквед хьиз, рушарини чи иер,
Гьар гьалтайдаз, гьич кIусни шак гъин тийиз,
Мердвилелди багъишзава милли хъвер,
Ам лам яни, инсан яни чин тийиз.

Хъвехъни пIузар туьнт рангарив асуниз,
Гьар жуьредин пекерив тан чIагуриз,
Тротуарар тик дабанрив къадгъуниз,
Къекъвезва куьн мешреблувал къалуриз.

Акур чIавуз куь рушвилин емишар,
Гьамишалугъ хвена кIан тир  кIевелай,
Куь гуьрчегвал, куь къаматдин нехишар,
Ширин гафар - сел къведа хьи мецелай.

Гила, мисал, лагьанай хьи: - Зи кур-кур,
Заз вун кIан я, табзаватIа лянет хьуй,
Ракьун пич хьиз ифенвай рикI мийир къур,
Зи пIинийрин мураба, ваз минет хьуй.

Авач гафар руьгьдин шадвал раиждай,
ЧIалар гзаф халкьнатIани инсанри.
Гьиссерикай зи чандавай лугьуда
Моцартавай кхьиз тахьай макьамри.

Фида уьмуьр, йикъар са-сад алатиз,
И чилин кIватI гьакI гьамиша элкъведа,
Амма заз гьич декьикьа вун галачир
Герек туш и аламатдин дуьньяда!

Гьатна, суна, лап суьгьуьрдин гьалкъада,
Ван хьайила муьгьуьббатдин хуш гафар.
КIвалах туькIвей суьгьуьрчини цIрада,
Туна рушаз пашманвилин бул накъвар.

Гзаф хьана ихтилатар булахдик,
Буба авай яда лугьуз гуьлледив.
Тахсир кутаз инсанрикни Аллагьдик,
Велед бахтсуз хьана лугьуз дидеди.

“Хаинвална на намусдин къанунриз”,
Лугьуз халкьди авунай ваз тегьнеяр.
КIваляй-кIвализ барабар яз къузгъунриз,
Физвай чIулав, гьахъвал гвачир фитнеяр.

Хъуьрезвай вал эркекар ва дишибур,
Чин амачир вахъ куьчеда къекъведай.
Вири хьанвай камаллуяр, михьибур,
Са вун тира кьацIанвайди фитедай...