Дашдемир Адилов

Багьа я заз, уьмуьр хьиз, зи лезги чlал,  
Ифирнавай чатухъандин къати цlал. 
Рекьидалди акъат тийир кlарабрай,  
Туруни хьиз, акъуддай зун азабрай.        

Зун лезги, захъ зи лезги чlал ава,  
Туькlвей бахча, кьве мертеба кlвал ава. 
Мукьвал-мукьвал теклифзавай дустариз, 
Къуват гузвай ашкъивилин къастариз.     

Къарагъ, лезгияр! 
Вахт я жер уях,  
Сада-садакай  
Кьаз хьурай даях.  
Битав къуватар  
Ялин садвилихъ,  
Дарискъал дуьнья  
Гьалин шадвилихъ.    
Негьиз чиновник,  
Тlарашчи, къанлу,  
Шарвилид невеяр  
Язва куьн жанлу. 

Дидеди хьиз, нек гана заз хурудай,
Кутуна зак жумартвилин руьгь, гьевес.
Кьил акъудна къенидайни чlурудай,
Зи халкь патал хкажзава гьахълу сес.

Зи рикlикай суфра хьуй квез межлисдин,  
Амма ана кам тахьурай иблисдин.  
Зун лезги я физвай хуруз чайгъундин,
Невсинал цlай эцигзавай азгъундин.      

Лезгистан я зун  
Дидед(и) хайи кlвал,  
Лайлаяр ягъиз,  
Зегьмет чlугур зал.

Ина сифте яз  
Илифда гатфар,  
Цавалай къвада  
Берекат, марфар.        

Юмшагъ я гзаф
Инин тlебиат,  
Кефсуз касдилай  
Вахчуз азият.