СтIал Саяд

Булахдилай хкведай хьи
Ви кIвализ зун квар къачуна.
Вун зи вилик къекъведай хьи
Хъуьрез-хъуьрез, тар гъилеваз, яр.

Зун ашкъиди кьурла есир
Вучиз за ваз ахъайнай сир,
агь, за вучин, хьанай тахсир
Гьа ви патав атун, кавха.

И дуьньядин чин кIаник хьуй,
Чи дердериз дава тахьай!
Шехь тавуна зи гьал гьикI хьуй,
Садакайни чара тахьай?

Шагь дагъларин чиг шагьварди
Чи дугуниз сегьер гъана.
Бер къубудин дегьне кIамай
Шагьварди ви эвер гъана.

Сагърай эллер! Жанавурдиз
Кьасаб авур кIел я Саяд.
Къвемир, стха, вун зи патав,
Вав уьмуьрлух хъел я Саяд.

Кьаз алахъмир, гъиле гьатдач,
Кьаз жеч вавай билбил таза.
Вун девлетлу кас я лугьуз,
За муьгьуьббат гудач маса.

Диде, вуна зун куьз ханай,
Катна закай къакъажна кьил?
Зун верч кьейи цицIиб хьана,
ЛипIлипIри зи алажна кьил.

Беневшади кьил галтадиз,
Зи дердинкай кьазва хабар.
Къанлу дагъдиз аватна зун,
Квахьнавайд я, вах, зи ахвар.