Кавхадиз

Зун ашкъиди кьурла есир
Вучиз за ваз ахъайнай сир,
агь, за вучин, хьанай тахсир
Гьа ви патав атун, кавха.

Залум стха хьайила азгъун
Хьанай завай вавди рахун,
Винелай сагъ, къене бархун,
КтIанвай рикI, каркун, кавха.

Мелгъуьнди зи хъуьрез-хъуьрез
Кьел вегьена зи кайи хирез.
Кьисметрай ваз чара тижез
Иландин мез атIун, кавха.

КрчаллукIна квез я дамах,
Намус квачир хпен бапIах?!
Буьркьуь я кьве вил, рикIни алчах,
Авач хьи вахъ кьатIун, кавха.

ГьикI фейитIан – зи рехъ кузва,
Хкаж гъилер, ая суза,
Фасадари кьадач арза.
Ви рикI яни ракьун, кавха.

Саядан чан ятIан гьайиф,
Ви вилик жеч алчах, зайиф,
Ви терездин мийир тариф,
Бес хьана заз акун, кавха.