Медет Арзуманов

Лагь

Вили цавалай авахьна фейи 
Гъед ви уьмуьрдин эхир яни, лагь!
ЧIулав шаршавдик акахьна фейи 
Даканда тухвай фагъир яни. лагь!

Ашкъидихъ кайи Саядан нисбет
ЧIугваз цIрана Шихрегьим хиффет.
РикIе къекъуьрай Кереман сурет.
Эсли куз фейи жигьир яни, лагь!

Илагьи

Экуьн кьиляй чиг ацукьай цуькверин 
Хуравай зар квахь тавурай, илагьи!
Ашукь хьайи билбилринни нуькIверин 
Пак агьу– зар квахь тавурай, илагьи!
Гьуьлуьн кьиле цIай къурди хьиз аквазвай,
Лепеяр физ пак нурара акьазвай,
Каниди хьиз куш-кушдалди рахазвай

Шехьа зи рикI

ЦIурурзава дердери вун
За лугьузвач : «-Шехьа зи рикI!»
Ви кьисмет я гъамуна кун
Эха зи рикI, эха зи рикI!

Гьатнавай хьиз ви къене хуз
ТIалдава вун къачуна зуз.
Гьеле кудмир на жуван пIуз 
Эха зи рикI, эха зи рикI!

Зун я, зун

Дуьнядикай атана пай 
Галукьайди дидардин цIай,
Хайибуруз хьана тахай
Дерт-гъамуна кана хъухъвай
РикIин къене авайди чIун 
Зун я, зун!

Мурад рикIе амукьайди,
Гаф ккIал хьиз галукьайди,
Татаб хьана амукьайди
Акъатайди рикIе чайгъун
Зун я, зун!

ТIвал

РикI чуькьуьзва дердери 
Чар чуькьуьзва бендери.
Кенефдин кьил квахьнаваз
Зун хьанватIа сесери?!

Зи чIаларал чIал хьана 
Гафун винел къал хьана ,
Кенефда тIвал гьатнаваз 
ТIвалди винел тIвал хьана.

ТупIалаймир дердер икьван, ваз гъамунун пай жеда гьа!

ТупIалаймир дердер икьван, ваз гъамунун пай жеда гьа!
ХъуьтIуьз кIвале туьхъвенвай къул, ви хиялда цIай жеда гьа!

Квахда мани, кIуфаллай хъвер, чиз амукьдач ийир-тийир,
Ви кьисметда акьада хар, къулай уьмуьр зай жеда гьа!

Шезва

Им вуч дерт, вуч жуьзем, вуч хажалат я,
Чи тандиз чим гайи ракъарни шезва.
И дерт зи туьтуьниз вегьей мукIатI яз
Чпикай кватна кIанз таргарни шезва.
Чи мублагь чилер нин гъилера гьатна,
Чи вагь-цIугь цавара, чилера гьатна.
И гъам, чи хъвер кIани вилера гьатна

Такуна

Гагь-гагь за пешериз чIалар кхьена,
Бегьерди кьатIзавай тарар такуна.
Эмбизар стфунна, къуьлер кьечIена,
КIвачерик акатай тварар такуна.
Зи хуру цуьлериз рат хьана ама,
Цуьлерин кIуфун хъвер къат хьана ама.
Рат, хура рикIин дам кьатI хьана ама,