Шезва

Им вуч дерт, вуч жуьзем, вуч хажалат я,
Чи тандиз чим гайи ракъарни шезва.
И дерт зи туьтуьниз вегьей мукIатI яз
Чпикай кватна кIанз таргарни шезва.
Чи мублагь чилер нин гъилера гьатна,
Чи вагь-цIугь цавара, чилера гьатна.
И гъам, чи хъвер кIани вилера гьатна
Вилер хьиз рцIамар, кIакIарни шезва.

Гьиниз фин дердерин, гъамарин гъиляй,
Акъудиз кIанзавай акьул чи кьиляй.
Фураер акъудзаваз накъвари чиляй,
Къулпаяр акъатай накьварни шезва.
Серсери дуьнядин хак акъатнаваз,
Шумудан гьиссерик квак акатнава.
Шумуд са кIвалерин рак хкатнаваз
Гум атIай гурмагъ хьиз дакIарни шезва.

Гъамари вуч яман эгъуьнзава рикI,
АцIанва, алахьиз къудгъунзава рикI.
Вучин за, дердери чIадгъунзава рикI,
ЧIадгъунай рикIевай гъамарни шезва.
Агь гьикIин, агь вучин, эхин гьи сиягъ,
Кьисметдин цавара куькIуьзмач чи рагъ.
Къекъвезва зи танда ахьтин са гъуьлягъ,
Ам акваз кичIе яз шагьмарни шезва.

Акъата зи тандай акъата, я гъам,
Алахъмир вун икьван алажиз зи хам.
Зи рикI пад хьайитIан зун жедач ваз рам,
АкIуртIан ваз кIуфал “агьарни” шезва.
ХупI чIуру хьанва чи чилин гьава,
Къвазвай цаварай чал марфадин кул.
Дурнайри тунва гьай-гьарай цава.
Хура гьатнавай хъутума, гъулгъул.

Зи рикI хьиз я цав, атIанвай кьарай,
Гъамун цифери авунвай чIулав.
Акъатзавачир дурнайрин гьарай
КьуртIани рикIин цавари ялав.
Ахъа хъижеда мад цаварин чин,
Хъуьреда цава чаз вил ягъиз рагъ.
Сефер давамда дурнайри чпин.
Амма куькIуьдач зи рикIин чирагъ.

Экуь цавариз чкIизва зи гум,
Кузвай гъамуниз зи рикI хьана къул.
Зи йикъар ийиз мичIи, хурушум
Гъамуну бахтунал алтадзава кул.
Хаз хьанайтIа къе завай и терс кул
Акъатдай рикIяй хъутума, гъулгъул.