Такуна

Гагь-гагь за пешериз чIалар кхьена,
Бегьерди кьатIзавай тарар такуна.
Эмбизар стфунна, къуьлер кьечIена,
КIвачерик акатай тварар такуна.
Зи хуру цуьлериз рат хьана ама,
Цуьлерин кIуфун хъвер къат хьана ама.
Рат, хура рикIин дам кьатI хьана ама,
Ратавай хъитIкьерар, сварар такуна.

Теснифна за гзаф вирин кьер, хъуьчен,
Яшариз аватай ацIай вацран хъен.
Куьн гьина амукьна, я Атар, я Мен,
Зи кьарай атIузва зарар такуна.
Зардикай хьайтIани зи чхрадин ричI,
Бес вучиз гамуна гьатзавай икI ичI?!.
И гичIивили зи рикIиз ягъазва гьей кичI,
Цуькверин экв гузвай ярар такуна.

Гафунин женгина-са къалдава зун,
Юргъун я, галатна пис гьалдава зун.
КьенайтIа хъсан тир икI тIалдавай зун,
Чи кьилел къвезамай крар такуна.
Ватан пайи-паяр хьана акур икI,
Авахьа я вилер, хъитIкьина тIун рикI.
Зи хура амазва вун секиндиз гьикI
Ватандин хиреллай карар такуна?

Им фана дуьня я, пичивилиз хъархъ,
Элкъвезвай терсина чи кьисметдин чарх.
Вуч акван дуьнядал зун авунвай ярх,
Ягъ-ягъун, къиргъинар, къалар такуна
Инсанрин сузаяр, тIалар такуна.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.