Темпел лукIраз меслятар ийир кас,
Дуьзбур туш ви фикирар гьич са кIусни,
Илим чира, ви мефтIерал ала пас
Акур туш вун марифатлу са касни
Яр, ви чинин ранг акурдаз, экуьн чIаван ярар затI туш,
Магьид рангунин гардан алай дуьньядавай рушар затI туш.
Китайдин хьуй, кIантIа Римдин пачагьар ви гуьзелвилин
Есир хьана, лугьузва, вав Цезарарни Кирар затI туш.
Гьейран ийиз вири алем, экуьн ярар къеледай,
ЭкъечIна ам, лацу чинал хъуьрез пIузар, къеледай,
Вилер цIару, вич къизилгуьл, гузвай атир къеледай,
Чилелай физ шабалатдин ранг алай чIарар, къеледай.
ЭкъечIда зун Мажнун хьиз, Лейли аквар къеледай.
Са касдихъ гьи ар авачтIа, жедач эсер, бес гьикIин?!
Къвахдин тIар ятIан гужлу, гудач ббегьер, бес гьикIин?!
Са инсандик итимвилин квачир бере са лишан,
Гудач халкьдиз хийир, гъиляй къвез виш гьунар, бес гьикIин?!
