Къеледай

Гьейран ийиз вири алем, экуьн ярар къеледай,
ЭкъечIна ам, лацу чинал хъуьрез пIузар, къеледай,
Вилер цIару, вич къизилгуьл, гузвай атир къеледай,
Чилелай физ шабалатдин ранг алай чIарар, къеледай.
ЭкъечIда зун Мажнун хьиз, Лейли аквар къеледай.
А мубарак минарадай экъечIда ам рагъ хьтин,
Экуьн гарал наз гузавай, гьар пад дуьзмиш багъ хьтин,
Чин къалурна цIувад йикъан тамам вацран чагъ хьтин,
Гьар жуьредин цуькверивди дуьзмишнавай дагъ хьтин,
ЭкъечIда ам, вири дуьнья ийиз серсер, къеледай.
Лацу чинал хъуьрез-хъуьрез кьелечI пIузар къеледа,
На лугьуди лалидин нур гьатна вири къеледа,
Дуьньядавай гуьзеларин шагь хьиз ама къекъведа,
Иллагьиди халкь авур и тек затIунихъ элкъведа,
Жанлу алем, умудлу яз акун сувар къеледай.
Бахш авуна, я иллагьи, зи гуьзел ярдиз камал,
Квахьна гьарнихъ зи сабурни, зи акьулни, зи хиял,
Ам гудачтIа, заз герек туш, я гьуьруь, дуьньядин мал,
КIандатIа це женнетдин юкь заз, заз виже къвеч а амал
Тур вуна зун и авай гьал, къвез серин гар къеледай.
Ашкъидин шайда на хьурна, квахьнава, рабби, зи кьил,
Гъам-хажалат хьанва зи пай квехъ агакьрай мад зи гъил,
Хьурна кьисмет, яр, ая шад Ахцегь Назиман гевил,
Селди гьална зи чинал, нагъв къвез ажуз хьана кьве вил,
Заз акваз хьуй гьар юкъуз зи рикI алай яр къеледай.

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.