КIан жеда гьикI хъфиз хайи СтIуриз ,
Майдин вацра кьуд пад къацу хьайила.
ЦIрадайла живер вацIуз авахьиз,
ТIебиатди цуьквериз чан гайила.
ЦIигел я зун хуьруьн къайи булахдихъ
КIаник галай машгьур кимихъ жегьилрин .
Наз гузавай чи таватрин бухахдихъ,
Акунривди дерт чукурдай сефилрин.
Ван алатна фирла лапаг яйлахдиз
РикIел къвечни чун ацукьдай чIереяр?
Къацу чIурал вирт кIватдай чижер хьиз
Къугъваз- къугъваз келер хуьдай береяр.
Хъфиз кIанда айвандилай килигиз,
Шагьдин суван живер алай кIукIушриз.
КъведтIа яраб чубарук мад илигиз,
Манийралди миливал гъиз зи рикIиз?
Рубрика
Добавить комментарий