Бес архайин яни ви рикI

Атана чIав чара жедай
Зун са патахъ, вун са патахъ..
Чи ругьериз  къаяр къведай
Хиялариз :вуч хьанва чахъ?
Алахънава секинариз
Акъваз туна гьа вуна зун.
КIанзавач ваз деринариз
РикIеравай  къенин  юзун.
 Заз чида вун  валай  хъсан,
Руьгь  инамаз фин туш асан …
Акъвазнава зун килигиз
Кьиткьиннавай нагъв вилериз,
Гьал кумачир  ви гъилериз…
Гафарилай  зурхъуман   ви
Муркар жезва  чанда иви !
Мажбурна жув хъуьрезва зун,
Саймазди  хьиз къекъвезва зун…
Туна рекъе  жуван гъилив
Агакьнава исят кIвалив.
ИчIивили акъудна йекь …
Къефесдава саки са лекь…
Ингье, гила къеняй ргаз :
«Бес архайин яни ви рикI?
Вуна ам тек валай яргъаз
Залумдин хва , ахъайна гьикI?»-
Жузаз  завай  гузвач аман ,
Зун , къеневай гьа зун хьтин
Са масада кузва яман…