СтIура...

Гьидан хуьряй шумуд шаир акъатнава
Лугьуз гана интернетда суал сада
Жаваб гун за  : эхь , шаирар   СтIурава
За гьисабин , тупIар къата   вуна  гада.

Ваз чидани  СтIур Далагь -чIехи мазан
Хабар гайи цикьвед лагьай виш йисарай
Къелем хци, вичихъ авай терез –мизан,
Эхиз   тахьай чIанавилер  ,  чIугваз  гьарай.

Машгьур  кас  я   Дагъустанда  Байрам халу
Халкьдин   шаир   тIвар къачунвай   хуьруьнви   зи,
Ам  чи дамах, ам   чи даях,   ам   чи далу ,
Адан    мили   шииррилай    я  эл   рази!

Рахан    гила   кхьинрикай  Келентаран
Шииратдин  кукIуш тир  са алемдикай ,
ГъайитIани на кьил- кьилел   дагъни   аран
Жагъуриз жеч вавай ихьтин   къелемдикай.

Зерифедин гьар са шиир-са жавагьир
Философдин кьатунарни фагьум галай
Гьар цIаруна ава  хайи хуьруьн  атир ,
Алакьдач    икI   иер кхьиз залай -  валай

РикIерава  Куругълийрин Рамизан  тIвар
Дуьнядилай   фенатIани   жегьилзамаз.
Мецяй- мециз  физва адан гафар ,цIарар-
Ватан кIани сеняткарар азиз я чаз!

ЛакIаб    кьуна   СтIурви   хьиз Шакира чи
Теснифзава хайи ватан, хайи чилер.
Куьн  сагъ хьурай   Салимован мирес гъвечIи,
Жани лугьуд  чIехи тарцин зурба хилер.

Алимурад  Шагьдагъвини  фена,  туна
Чаз вичелай   ядигар яз шумуд  улуб.
Твадай  касди  зергерди   хьиз   гаф   хатIуна
Авай   адаз   вичин   къелем ,  вичин  кIалуб.

Инал   белки кутьягьин за  гьисабунар
АматIани  шумуд шаир тIвар кьун тавур ?
Эхь, шаирдиз  герек я хьун зурба пунар:
Дамахар тир илгьам гъидай   - Шагьдагъ  ,СтIур!

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.