Зи КцIар

Мад сеферда ахъайна вил,
фагьумна за дагъ, дере, гьуьл.
Цавун черчин хунча яз чил,
Гуьрчегвилел гьейран я зун.
Герчеквилел гьейран я зун.
Чилин винел, цавун кIаник,
Каспид къуьнел, Шагьдин гиник
Са район ква, саки са цуьк,
Вич теквилел гьейран я зун,
Гуьрчегвилел гьейран я зун.
Са кьил дагъ я, са кьил аран,
Беден багъ я, вич экв яран.
Юкь чи рагъ яз Суван, Ларан,
ТIвар я адан КцIар район; 
Гуьрчегвилел гьейран я зун.
Ина дагъдин багъман я рагъ,
Ина багъдин Лукьман я рагъ.
Инаг, ам вич авай саягъ
Район тушиз женнет я кьван,
Дагълар адан зинет я кьван.
Ина цуьк я чуьлдин лифер,
Ина чиг я кьиблен кефер...
Инаг, йиф яз йикъан кефер,
Вич гуьзелдин суьрет я кьван.
Ина кьакьан дагълар гуьзел...
Ина йикъан багълар гуьзел...
Инаг чил я халкьар гуьзел...
Гуьзелвилин рикI я КцIар,
Вич са гъвечIи цуьк я КцIар.
Мад сеферда рамна къелем,
Фагьумна за вири алем.
КцIар хьтин гуьзел, бегьем
Гьич са чилни акунач заз.
Гьич са чуьлни акунач заз.
Бейкеф тахьуй Азербайжан,
ГьакIни чIехи къадир Ватан.
Кьведни рикIиз ятIани кIан,
КцIар вилин нине я зи.
КцIар хайи бине я зи.
Чилин винел, цавун кIаник,
Гьуьлуьн къуьнел, дагъдин гиник
Са район ква – саки са цуьк.
ТIвар я адан КцIар район.
Герчеквилел гьейран я зун.
КцIар – зи рикI, КцIар – зи чан.
КцIар – зи цуьк, КцIар зи ван.
Даим жаван КцIар жуван
Гуьзел хьунал гьейран я зун.
Гуьзелвилин къурбан я зун.

1984