Муьзеффер Меликмамедов

Муьзеффер Меликмамедов

ТIвар-ван авай шаир ва публицист Меликмамедов Муьзеффер Низамович 1948-йисуз Къуба райондин Дигагь хуьре дидедиз хьана. Ада юкьван мектеб ва Азербайжандин университет куьтягьна. Гзаф йисара Бакудин газетринни журналрин редакцийра кlвалахна. Алай вахтунда ам "Самур" газетдин редактор я.
М.Меликмамедов ватандикай ва халкьдикай, гьахъсуздаказ кьве чкадал пайнавай лезги миллетдин месэлайрикай теснифнавай са жерге ялавалу очеркрин, эссейрин, шииррин, поэмайрин ва маса эсеррин автор я. Абур лезги, азербайджан ва урус чIаларал газетринни журналрин чинриз ва кьилди ктабар яз: 1991-йисуз публицистикадин "Лезги тIвар алатIа..." ктаб Махачкъалада ва 1992-йисуз "Беневша хьиз экъечIда" шиирин кIватIал Бакуда акъатнава. М.Меликмамедован эсеррихъ инсан тербияламишун жигьетдай еке къуват ава, абур лезги мектебра чирзава.
Шаир Лезги писателрин союздин член я.

Акимов Къ. Х. «Лезги зарияр»

Рубрика

Комментарии

БАКУДА «ЧРУРНАВАЙ» ЛЕЗГИ ХАИНРИЗ

Кьулан вацIун эрчIи пата
Чаз са тупIал гапIал хьанва.
«ЧIал туьхкIуьрда, - лугьуз, - чна!»,
Гьардакай са чакъал хьанва.

ЧIалан къадим къайдаяр чи
И авамриз виле амач.
Аквар гьалда, чпин чIварах
Фадлай лезги чиле амач.

ЧIал – йисарин кьадар квахьай,
Тарих дерин тар я кьакьан.
Ам чан алай затI хьиз зурба
Кьабул авун – кар я хъсан.

Лезги рикIе гьар гафуна
Вичин кьетIен «иви» ава.
Гафарал хер ийирбурун
Сиве цIапаш писпи ава.

Бакудавай туьрк гьакимрин
Манатрихъ ягь маса ганвай
Гьар са «кьегьал» хаиндикай
Халкьдин виле кваса хьанва.

Ихтиярар ни ганва квез
Кьабул хьанвай чIал дегишдай,
Чи гафарин къанунарни
Чи рикIерин звал дегишдай?

Куьн кьегьалар ятIа, экъечI,
Рахух халкьдин гьалдикай куьн.
Куьз луькIведач садра кьванни
Кьве пай хьунин тIалдикай куьн?

Илгьамазни Мегьрибаназ
Куьз лугьудач, хура туна:
«Вучиз икI чи бинедин халкь
Чан аламаз сура туна?!»

Тарихравай «Лезгистан» гаф
Куьн сивел гъиз кичIебур я.
Биневачир халкьдиз ламвал
Авун патал вижебур я.

Куь гьар садан гъиле бистIи
«Стха халкьди» тун квез хуш я.
Лезги халкьдин тарихни эрк
Фад-фад маса гун квез хуш я.

Куьн «сагьибрин» савда къалин
Ийиз вердиш далалар я.
Лезгидин куьк квадарнавай
ЦIуд чин алай дажалар я.

Куьн вири чаз чизва са-сад,
Куь тIварарни, крарни куь,
КIанерикай угърашвилив
Эгъуьнзавай фурарни куь.

Куь дамахар, квев гвай тупар
Кьурубур я, лагълагъар я.
Куьн – мидяйрин парчагъанар,
Ягьдин рекьяй члахъар я.

Бесрай а куь «кьегьалвилер»,
Куь чинилай лакъаб алуд!
Жедач квевай квел атанвай
«Хаин» лагьай лакIаб алуд!

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.