Вириниз сейли хьанва

Вич Дербентда дидедиз хьайи, аял чIавалай буба­дивай уьзуьмчивилин сирер чириз алахъай Шамил Гьуь­сейнов гила и рекьяй неинки Россиядиз, гьакI къецепатан уьлквейризни сейли алим я. Дагъустандин Хуьруьн Майишатдин Институт агал­кьунралди акьалтIарай адан алатай асирдин 60-йи­сара уьзуьмчивал вилик тухунихъ галаз алакъалу тир сифтегьан илимдин макъалайрикай Но­во­черкасск шегьерда авай Вирироссиядин Уьзуьм­чивилин ва      Чехирчивилин Илимдин Ахтармишунрин Институтдин кьиле авай­бу­руз гзаф хуш атанай ва абуру лезги жегьилдиз чпин илимдин карханада кIва­лахун теклифнай. Ина кIвалахиз эгечIай Шамила са шумуд йисалай аспирантура акьалтIарна, хуьруьн майи­­шатдин илимрин кан­ди­дат­вилин диссертация хве­­на. Куьруь вахтунда док­торвилин диссертацияни хвейи жегьил алимди инс­ти­тутдин агротехникадин лабораториядиз регьбервал гана.
Россиядин хуьруьн ма­йишатдин илимдик ла­йихлу пай кутур Шамил Гьуьсейнова уьзуьмчивал вилик тухуз мумкинвал гу­дай районар винел акъуд­­на, кьилди проектар туь­­­­кIуьрна, санайидин уьзуьм­­чивиле кардик кутан па­тал цIийи тартибар жа­гъурна, уьзуьмлухриз тех­никадин куьмекдалди къул­­лугъ ийидай методар гьазурна ва маса цIийивилер арадал гъана. Сифте яз ада кIевирнавай чкайра кутунвай уьзуьмлухрай бегьер къа­чунин цIийи технология кардик кутуна. Ада арадал гъайи цIийивилери шпалер галачир уьзуьмчивал вилик тухудай мумкинвал гана. Гьа ихьтин агалкьунрай ам шумудни са  премийриз ла­йихлу хьанва.     Профессор Ш.Гьуьсейнован илимдин эсеррикай ва тежрибадикай Европадин уьлквейрин, илла­ки Болгариядин, Чехиядин, Словакиядин уьзуьмчийри гегьеншдиз менфят къачузва.
И йикъара лезги алимдин тIвар Россиядин хуьруьн майишатдин виридалайни хъсан 100 алимдин сиягьдик кутунва ва адан илимдин кIвалахрикай уьзуьмчивиле генани гьегьеншдиз менфят къачун патал талукь ида­райриз тапшуругъар ганва.
Шамил Гьуьсейнован хва Мурадани бубадин рехъ давамарзава. Хуьруьн майи­шатдин илимрин кандидат тир ада уьзуьмчивал вилик тухуз куьмек гудай са шу­муд илимдин кIвалахар кхье­на чапдай акъуднава. Ш.Гьуь­сейнован руш Элвира медицинадин илимрин кан­дидат я. Машгьур алимдин веледриз мукьвал вахтара докторвилин диссертацияр хуьз кIанзава.

Тамилла БЕКЕРОВА, Дагъустан Республикадин Дербент шегьер, муаллим
"Самур" газет