ТIИГЬИРЖАЛРИН ХКЕТАР

Тlигьиржалвиди кlвалахзавай магазинда

Сарар чуьхуьдай паста «Сигнал» кlанзавай са аялди магазинчидив пул вугана:
–Халу, заз са «сигнал» ча ман.
Магазинчиди пул къачуна: –пи-пиипI! –лагьана анихъ фена.
Аялди мад: –Халу заз са «сигнал» ча ман.
–Па-паапl!
Вичиз яб тагуз акур аялди: –Халу за ваз пулни гана, вуна заз «сигнал» ганач эхир.
–Я бала, за ваз кьве жуьре сигнал гана, ваз мад гьихьтин сигнал кlанзава?

***
–Заз «къапу»дин питилар ча ман.
–Чаз къапудин питилар авач.
–Бес ибур вучар я? – аялди питилдал тIуб эцигна.
–Абур ракIаринбур я.

***
Магазиндай пасук къачуз кlанзавай са халади адаз пара килигна, тIимил килигна, кьве рикIин хьана магазинчидвай жузуна: –Я бала и пасукдихъ тlурар вучиз галатlа?
–Зазни чидач, я хала, зун духтур туш.

***
Тупуналди мал къачузвай са хуьруьнвиди мал тlимил къачуз акурла магазинчиди адавай жузуна: –Яда за ваз гьар са шеъ ужуз гузва, вуна тlимил вучиз къачузва?
–Я халу, чи автобусда жемят пара жезва, кlвачел алаз хъфена кlан жезва, гьакl хьайила пара кьаз жедач.
Магазинчиди:–Акl ятlа кlвачел алачиз хъфида ман.

***
                       Вири итимар я
Са тlигьиржалви балкlандин суракьдалди къунши хуьруьз акъатна. Рекьел гафарзавай пуд итим акуна абурув агатна: –Я стхаяр, куь ким гьина ава? Зун балкlандин суракьда атанва.
– Ваз и хуьре чалай пудалай гъейри итим жагъидач. Абур вири чпин кlвалахрал ала.
–Акl хьайила, квелай пудалай гъейри вири итимар я лагь ман, –лагьана тlигьиржалви вичин рехъди фена.

***
Бубади хциз: -Вач чан хва, къуншидивай нажах гъваш.
Са арадилай хтай аялди:-Абур к|вале аваче.
-Ак| ят|а чан хва, фена чи нажах гъваш.

***
Шагьаб муаллим манияр лугьуз мехъеррикни фидай. Са юкъуз адаз РОНО-дай эверна: - Я Шагьаб муаллим, вун са чIехи школадин директор я. Им вуч кар я, вуна Дагъустанда язвай манийрин ван са кьил Пакудив агакьнава. ИкI жеч эхир, я стха!
-Я чан чIехид! Куь балкIан кухунда лугьуз за зи гъенел далдамар хъиядачни гила?
***
                  Тартаяр гзаф хьанва
Са тlигьиржалви кьуьзуь кас автобусдиз акьахна. Вилик ацукьнавай жегьилри чка тагуз акур касди шофердихъ элкъвена:–Валлагь чан хва, дуьнья чlур хьанва, гьагила чlехи-гъвечи амач.
Ацукьнавай жегьилрикай сад адан гафарин ъавурда акьуна, кьуьзуьдан гаф атlана:–Я халу, а ваз акур валан кlане къуьрер амайди туш.
Хъел квай кьуьзуьда:–Чан хва, исятда вун хьтин тартаяр акьван гзаф хьанва хьи, икl хьайитlа валан кlане къуьр-къуьр я, гьич сикlни амукьдач.
***
            Куш низ хьана?
Вилик девирра къунши хуьрерин арада чилерин патахъай гзаф дявеяр жедай. ТIигьиржала Кушун патахъай кьиле фейи дяведай хъфизвай къунши хуьруьн жегьилрин вилик са мег рехи дишегьли экъечIна. - Я балаяр, гьикI хьана, Куш* къахчуз хьанани? -Ваъ, лагьана жегьилрикай сада дамах гваз, -чна абурукай ругуд итим кьена. Дишегьлиди кьил галтадна, - куьн хьтин ругуд итим са зун хьтин дишегьлиди рухун хъийида, Куш низ хьана, Куш?   
       *Куш ­ ТIигьиржала чкадин тIвар.
***
            ЦIегь тIуьрдан кьилел цIай ала
   Гишин йисар тир. Миримаз цура хуьзвай са хъсан цIегь авай. Йикъарикай са юкъуз адан цIегь квахьна. ЦIегь чуьнуьхна тIуьнвайди адаз якъин чизвай. Анжах и кар субут авуна кIанзавай. Bири кимел кIватI хьана ихтилатзавай арада Мирима ван алаз хьиз лагьана: – Килиг, гадаяр цIегь тIуьрдан кьилел цIай ала гьа!
   Кимел алайбуру вирида ван атай патахъ килигна. Абурукай сада кьве гъиливди вичин бармак кьуна цавуз килигна.
***
     Я шткидай кIвал авач, я ацадай кал (л.х.м.)
Кириман рушаз илчияр атанвай. Киримаз абур акьалтIай кесиб тирди чизвай. Гьавиляй абуруз руш гуз кIанзавачир. Тайин гаф атIанвачир. Ихтилатрин арада рушан халуди Кириман япал кушкушна: – Яда. гзаф динж чка я, тапана це, вучиз лагьайтIа абур я шткидай кIвал, я ацадай кал, яни гуьдай ник авайбур туш.

Юсиф Халилов

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.