Руьгь шад хьурай ви

Мирзали Рустамов

Чи литературади вичин зурба кхьирагрикай сад квадарна. ТIвар-ван авай педагог, драматург, хъсан ватанэгьли Мирзали Рустамов яргъал чIугур начагъвиликай 87 яшиндаваз кечмиш хьана. 1929-йисуз Яргунрин хуьре дидедиз хьайи Мирзали Эбилан хва Рустамова хуьруьн юкьван мектеб куьтягьайдалай гуьгъуьниз Къубадин Муаллимрин Институт ва Азербайжандин Гьукуматдин Педагогикадин Институт акьалтIарна пак муаллимвилин пеше къачунай. Саки пудкъад йисаз мукьва и кеспидалди дамахай Мирзали Рустамова жуван халкьдиз, адан културадиз къуллугъ авун, гележег несилриз кьакьан чирвилер гун уьмуьрдин къаст гьисабна.  Ада 50-йисарилай башламишна вичин дуст, кIвалахдин юлдаш, гуьгъуьнай “Лайихлу муаллим” тIварцин иеси хьайи Азиз Гьажиевахъ галаз санал тек са мектебдин ваъ, хуьруьн, райондин културадин мярекатрик къуьн кутуна. Мирзали Рустамован шиирар ва гьикаяяр 1960-йисалай журналрин, газетрин чинриз акъатнай ва кIватIалрик акатнай.  Къелем асул гьисабдай комедиядин жанрда  кардик ктур  драматургдин “Кооператив ашнабазхана”, “Кефербег”, “Рекетирар”, “Етим Эмин”, “СтIал Сулейман” хьтин пьессаяр Дагъустан Республикадин СтIал Сулейманан тIварунихъ галай Лезги муздрамтеатрдин сегьнедал эцигна. Сеняткардин “Кьилиз тефей гастрол”, “Гьа-йиф, алатай йикъар”, “Гьемдуллагьан хам хиялар”, “Санитар”, “ЦIийи завмаг”, “Меккедай хтай гьажи”, “Гьава ахъа жезва”, “Тахсиркар вуж я” пьессайри къениндалди КцIарин Гьукуматдин Лезги Театрдин репертуарда кьетIен чка кьазва. Адан са шумуд пьесса КцIар, Къуба, Хачмаз ва Худат шегьеррин сегьнейра къалурна. Мирзали Рустамова литературадин чIехи ирс тунватIани, сегьнедал эцигай эсеррин кьадардиз килигайла чи драматургияда сифте чкадал алатIани, адан зегьметдиз лайихлу къимет ганвач, са ктабни басма хьанвач. Чавай хьайитIа, хайи културадин, драматургиядин таъсиб чIугвазвай ксарикай сад юкьвал акъатна адан руьгь шадардай и кар кьилиз акъудда. Аллагьди рагьмет авурай.            

“КцIар” газет

Рубрика

Комментарии

Мирзали Рустамоваз рагьмет хьурай. Ада халкь патал, къвезмай гележег патал зегьмет ч1угуна. Амма, гьайиф хьи, адан яратмишунрин ктабар чахъ авач, чи библиотекайра авач. Чи "КУЬРЕДИН ЯРАР" культурадин центрвадини лезги ч1ал хуьн ва ам вилик тухун патал к1валах тухузва. "Перестройка" хьайидлай гуьгъуьниз Кц1арихъ галазни алакъаяр амач. Чун къвердавай къакъатзава. Им виридлайни хаталу я. Чи садвал сифтени-сифте чи хайи ч1ала, медениятди хуьзвайди ва мягькемардайди чна са ч1авузни рик1елай алудна виже къведач. Лезги Наметан яратмишунриз талукьарнавай мярекатда Кц1ара за иштиракна 20 йисар алатнава, амма ана иштирак авурбурун, чпин фикирар лагьайбурун шикилар къени зи вилеркай карагзама, япара сес ама абурун фагьумлу гафарин. Ихьтин мярекатар гьа пата, ва чи пата санал тухудай мумкинвилер чна жагъуна к1ан я. Секин хьана ацукьна виже къведач. Сагърай макъаладай!
"Куьредин ярар" культурадин макандин председатель А.Агьмедпашаев. Кьасумхуьр.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.