Бес четин тушни?

Дуст лугьуз кьуна са caнкIap, 
Хвеши хьун бес четин тушни? 
Намус квай тимдиз эксик кар 
Къарши хьун бес четин тушни?

Гьар намерддин гъавурда кьач, 
Я ваз тайин жаваб рахач. 
Жуван кIвализ набутсуз кIвач 
Уьлчуь хьун бес четин тушни?

Течиз вичин лугьудай гаф, 
Сивяй чкIиз гьар патахъ каф, 
Жуван акьул жуваз гзаф 
Яз чир хьун бес четин тушни?

Михеннатдал ихтибариз, 
Эхир вичин рикIни тIариз, 
Дуьз жаваб тефиз япариз, 
Биши хьун бес четин тушни?

Хъсан гафар маса гудай, 
ГатIурла серки хьиз кудай, 
Кьулухъай дабан атIудай 
Къайчи хьун бес четин тушни?

КIантIа паб хьуй, кIандатIа гъуьл 
Серф гьатайтIа атIуд ви гъил. 
Даим жуван винел пехил 
Къунши хьун бес четин тушни?

Иблисдиз лап пара еке 
Фитнедивди чIуриз уьлкве, 
ТIвар патал тIавафиз Мекке 
Гьажи хьун бес четин тушни?

Сулейман, рахамир пара, 
Чидайдаз бес я ишара. 
Эхир и инсанрин ара 
Турши хьун бес четин тушни?