Кьудар

* * *
Хаинри чеб къагьриман яз  гьисабзава къе,
Усалри чеб пагьливан яз гьисабзава къе.
Какахьнава кьиляй-кьилиз дуьньядин крар,
Маймунри чеб са инсан яз гьисабзава къе.
* * *
Вич гъвечІи тир инсандивай масад  чІехи ийиз жедач,
Руьгь пичІи тир инсандивай масад  михьи ийиз жедач.
Им дуьньядин къанун я са, чна хиве  такьуртІани:
Шем эгер вич кун тавуртІа, кьуд пад  экуь ийиз жедач.
* * *
Са гъилив заз хъсанвализ,
садав писвал ийизва на,
Гагь мердвализ, захавализ,
гагь фашиствал ийизва на.
Са беденда кьве инсан гьикІ
гьакьзаватІа малум туш заз:
Гагь малаик жезва вакай,
гагь иблисвал ийизва на.
* * *
Вахтар физва: цІвелин таран  уьмуьрдиз ухшар,
Цин патав гваз, гъин тийизвай вичи  бегьер-бар,
Я са шадвал, я азадвал, абадвал течиз,
Гьиниз физва, гьикІ физватІа авачиз  хабар.
* * *
Зун деврандиз, девранни заз хьанва къе душман,
Вуж гъалиб, вуж магълуб жеда? -  туш и сир аян.
Чи мидявал куьтягь тежер мидявал  хьанва,
ЯтІани и душманвилел зун жезвач  пашман.
* * *
Аллагь, вуна вири ганва угърийриз:
И дуьньядал гьар са нямет, девлет-мал.
Несиб ая гьич тахьайтIа дугърийриз:
Ислягь цавар, рикIин шадвал, сагъламвал.
* * *
Я Рабби, чи хифетар хьанва лап пара,
Ая чи дердериз Вуна са чара:
Са тІимил регьим тур рикІе залумрин,
АтІун тавун патал аман мазлумрин!
* * *
Тухузва зун уьмуьрдин вацІу хураваз,
Са луьткве хьиз, гьатнавай селлерин хура.
Мензил гьинал кьван ятІа авач чидай кас,
Вахтар физва алатиз, жез вара-зара.
* * *
Зун - са карван, вилик квайди сефер я,
АтІузвайди за мензил я, рекьер я.
Карван фидай чІавуз ампда кицІери,
Зи мидяяр элуькьзавай кицІер я.
* * *
Цавай фидай къушарни кваз эвичІзава чилерал,
Ша, алахъмир вун хкаж жез лайих  тушир синерал.
ТІарвал гзаф жедайди я аватайла  кьакьандай,
Амма кІусни тIарвал жедач аватайдаз аскІандай.