Билбил

ТIакьунамаз дагълара рагъ,
Багълара вун туна, билбил,
Авудна на эл ахварай
Гьар пакамахъ, суна билбил.

ЧидачтIани кIелиз-кхьиз,
Шиир кIани рикIер михьиз,
ТIвар-ван авай шаирди хьиз,
Ухшатмишда вуна билбил.

Сад элдин, сад юкьва чуьлдин
Ша экв жен гьар шад гуьгьулдин, 
Вун – ви гуьзел къизилгуьлдин,
Зун ярдин гъил кьуна билбил.

Чид я лугьуз кIани девран,
Кеф чIугвадай азад ватан.
Какадарна сад садак ван,
Мани лугьун чна, билбил.

1960 

Рубрика