Регъуьхбанни яр

Регъуьхбан

Батмиш ая на зи къуллугъ,
Гуда ваз нубат, гуьзел яр. 
Регъвез ахлад къедлай кьулухъ, 
КIандач ви шагьад, гуьзел яр.

Яр

На ви метлеб заз лагь ачух, 
Гъавурда тур, кьей регъуьхбан. 
Са кIус инсафвилелд рахух, 
КIвалин юкь уьцIей регьуьхбан.

Регъуьхбан

Им вад йис я кьена зи паб, 
Гьам я ваз чи эхир жаваб, 
Къазанмиша на са суваб, 
Зи рикI ая шад, гуьзел яр.

Яр

Икьван ви зал ният чIуруз 
Регьвей гъуьр бес жедан турус,
Куьз чидач, вун хьтинбуруз 
Гудайд туш за рей, регъуьхбан.

Регъуьхбан

ЧIугваз тамир на зав и агь, 
Кьабул мийир на и гунагь, 
ЧизавачтIа ваз зи темягь, 
Вун гъавурда гьат, гуьзел яр.

Яр

Уьмуьр хьана кьудкъад йисар, 
КIанзава ваз жегьил сусар 
Заз герек туш а ви тарсар, 
Ви элиф-бей-тей, регъуьхбан.

Регъуьхбан

А сенфиз заз акур ахвар 
Ви гъуьруькай хьун я чIахар, 
Зи гъилева регъуьн чIутхвар, 
Ахъайдач за яд, гуьзел яр

Яр

Вакай къведай а кьифрен ни - 
Кьадардилай туькьуьл хини. 
За фагьумна, гьич са гафни 
Авач вахъ туькIвей, регъуьхбан.

Регъуьхбан

Зи гьалдикай кьадай хабар, 
Кими жеч мад гьейри папар, 
Кьуна кIула вав гвай и пар, 
Жуван рекье гьат, гуьзел яр.

Шаир

Сулейман, чIугу азият - 
Ахмакьариз це насигьат, 
Терг ая на а хасият, 
Дуьз акъваз вун, эй регъуьхбан

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.