Яр ксанва кьакьан к1вале

Вун ксанвай кьакьан к1валин дак1ардай,
Мич1и багъдиз нур чк1изва женнетдин,
Ацукьна за зулуматда рик1 т1ардай,
Жагъурзава гафар, яр, ваз минетдин.

Зи хиялар а дак1ардай гьахьзава,
К1валин къенез са пад ч1улав  бахт галаз,
Кис хьанава, лугьуз жезвач гаф завай,
Рахазвайди тек рик1 я зи вахъ галаз.

Са умуд кваз за къайи йиф ч1ит1зава,
Килигдач жал, къе йифиз вун дак1ардай,
Жува жуваз сабур гуз чан-рик1зава -
Чими к1вале вахъ галаз за ахвардай.

Тарар мич1и, к1валер мич1и, бахт мич1и,
Тек ви дак1ар эквуьн къене эхъвезва,
Муьгьуьббат ваз хьанва гафар гьак1 пич1и, 
Ят1ани зун ви гуьгъуьна къекъвезва.