Куьз хъел я вун, я беймирвет,
Заз дуьнья агьузар ийиз,
Чи арада квадариз гьуьрмет,
Зун факъирдин рикI тIар ийиз.
Алагуьзли, вуч я ви къаст?
Яргъарилай жез вун заз раст,
Зи кьве вилив кьаз туна пас,
Икьван гуьгьуьл зи дар ийиз.
Экуьн кьиляй сегьер-сегьер къарагъна,
Къекъведа вун къачуз зирек кам, Марал,
Тик кьилелай келегъа ви илягъна,
Зун куз тада къачуз залай кам, Марал.
Вуч хабар я, къуншид кIвале кIватI хьана?
Чарахъ-парахъ, гьарай-эвер, гургьагур!
Экуьнахъди яцран гардан кьатI хьана,
Гила физва са-сад гьерер, гургьагур.
Алдатмишиз кесиб яркIар,
Амалар ква вак регъуьхбан,
Аквазва заз, бед я ви кар,
Квач ви сивик рак, регъуьхбан.
Шагьаддикай хьурна зирба,
Секлемдилай хейлин зурба,
Раж регъвез гъайила араба,
Ухкуз са тапрак, регъуьхбан.
