Хуьруьг Тагьир

Са руша дурнадиз

Ваз лугьудай са гаф ава,
Къваз са гъвечIи, азиз дурна,
Захъ дердияр гзаф ава,
Твах зи метлеб кьилиз, дурна.

Зун я хесте, вун я Лукьман:
Зи дердиниз ая дарман.
Зи ширин чан ида къурбан
Вун физ авай рекьиз, дурна.

Дидедин гьал пис туш

Пара пис туш чи гьал, диде,
КIвал ава чахъ сач авачир.
Хзан – къалин, тIуьнни – пара,
ХъуьтIуьн бегьем раж авачир.

Чин чIур мийир, эй бейниван,
Чирна рахух тахсир жуван.
Гьинай гъида ягълу-яван?
Фу нез тахьуй къач авачир.

Такабур дагълар

Куьне садра ая сабур,
Сад-садалай кьакьан дагълар.
Кьил цава кьуна такабур
Ше жемир куьн акьван, дагълар.

Гьар са затI хьайила битмиш,
Техйиз дуьз аранар саймиш,
Гуьзел чуьлдин къачуз къаргъиш
Хьунухь дуьз туш, яман дагълар.

Файдадиз

Фагьумайда, и дуьньяда
Валай пис шеъ авач, файда,
Къачурда вун аслан хьтин
Итим жеда яваш, файда.

Эгер гьатайтIа гъиле буш,
Экьреб хьтин алатдай туш,
Я вах хутхуз, я вуна руш,
Я вун гьахьтин къаркъаш, файда.

Я кас

Минет авуналди пара
Гьич зи гафар хьизни, я кас.
Бегьер тагур цIвелин тара
Ширин майва гъизни, я кас?

Мергьямятсуз, мискьи, кIеви,
Фикир гьакьван чIуру я ви.
Зилиди хьиз хъвана иви,
Кьиникь яни видни, я кас?!

Диде

Эгер вуна ханачиртIа,
Жедачир зун пашман, диде!
Бахтсуздаказ зун дуьньядиз
Вучиз гъана, думшан диде?

Са гьафте я, туш им гъибет
Авачиз зун шалвардин мет.
Йифди-югъди къачуз зегьмет,
Чан гуда за гьикьван, диде?