Лейли Ханум

Гьуьжет

Летиф:
Дагъустандай атай гуьзел,
За вун чаз мугьман ийида.
Чуьнгуьр хада ахъайна хьел,
Ви гуьгьуьл виран ийида.

Лейли Ханум:
Вуна зун мугьман авуртIа,
Чан за ваз къурбан ийида.
Иви къведа, хьел чIугуртIа,
Ви перем алван ийида.

Ийимир

Эй, туьтуькъуш, аллагьдин хатурдай,
Зи чинебан сир ашкара ийимир.
Вегъемир зун элдин вилик абурдай,
Зи чинебан сир ашкара ийимир

Гьатна рикIе ашкъи, за вуч ийин мад?!
НиштIер яна, ийида за зи рикI пад.
Жув рекьида, вун ийида за азад,
Зи чинебан сир ашкара ийимир.