Ахцегь Гьажи

Нефсиниз

Гьар са азардин винел вун
ТуькIуьрнавай султан я, нефс.
Риаятриз зулум идай
Адалатсуз дуван я, нефс.

Вуна хийир къалурай кар
Эхир кьилиз зиян я, нефс.
Чун зияндиз тухузавай,
Белки, вун гьа шейтIан я, нефс.

Дуьнья

Дуствиливди эгечIда вун,
Вал ихтибар ийич, дуьнья.
ГалчIур уна къекъечIда вун,
Вал ихтибар ийич, дуьнья.

За авуна агъзур хиял,
Вун паталди кIватI хъийич мал,
Халкь авурда хуьда аял,
Вал ихтибар ийич, дуьнья.

Ярдиз

ТIарам, лугьун за ваз са чIал,
Гьамиша вун акваз кIан я.
Килигзава буьтуьн ваз эл,
Гьамиша вун акваз кIан я.

Хьана хьи зи рикI вал ашукь,
Ви буй-бухах, акурла юкь,
Вун за лагьай чIалал алукь,
Гьамиша вун акваз кIан я.

Гуьзел

Гафар ава ваз лугьудай,
Ша къаншардал акъваз, гуьзел.
Тарифар я ваз ийидай,
Яб це анжах на заз, гуьзел.

Ви къаматдиз ава абур
Лугьуз, жемир вун такабур.
Зи рикIивай жедач сабур,
Яргъалай вун акваз, гуьзел.

Ахцегьар

За лугьуди Ахцегьрин тегьер,
Шегьердин султан я и хуьр,
Гьар затIуни гуда бегьер,
Дердинин дарман я и хуьр.

Дилмиш ида атай саил,
КIвализ гъида ам, кьуна гъил,
ТIуьн-хъун гана, шадда гуьгьуьл,
Кесибриз девран я и хуьр.

Дагъустан

Уях я гьар са вилаят
Вакай мус хьуй затI, Дагъустан.
Вун гъафил я лугьуз даим,
ЧкIана ви ад, Дагъустан.

Чна дуьнья тийиз фагьум,
Вагьшияр хьиз я хьи чун хам,
Халкьар къене чун я авам,
Бес чун гьикI хьуй шад, Дагъустан.

Кесибдиз

Кесиб кас хайитIа вели,
Хьанваз гьисабда ам дели.
Пуллуд кьада камалэгьли,
Кесибвал хупI зегьмет я саз.

Пуллуяр я пулдин мирес,
Пулсузвал я гьамиша яс.
Кесибдиз жагъич мукьва кас,
Кесибвал хупI хифет я чаз.

Гъур

Шукур хьуй ви чIехивилиз,
Гъурал вацIун яд жезава.
И меслягьат фирай кьилиз,
Лугьуз чи фергьяд жезава.

Гил чи халкьар амач авам,
Гьар са затIдив хьана тамам,
Хийирлу кар ийиз фаггьум,
Крариз чун устад жезава.

Тайгъун

Чи жегьилар алдатмишиз
Ви гьал хупI хъсан я, Тайгъун.
Вуна заз яр гуьзетмишиз,
Ви кефи хупI шад я, Тайгъун.

Халкьар (а)ва ви дердина
Бедназар кими жеч ина,
Тензиф тур на лацу чина,
Вун гьумайдин агъ я, Тайгъун.

Гуьлемет

Исятда Ахцегьарин къене
Вун я тестикь «шагь» Гуьлемет.
Садазни яб гумир вуна,
РахайтIа вавди, Гуьлемет.

Ава ваз эфсердин дунар,
Къудратди ваз гана гьунар,
Гила ваз багъишда чинер,
Начаникдиз лагь, Гуьлемет.