Алимурад СтIурви

Заз це, Руслан

Къарибда ви сурун патав
Заз са чка таз це, Руслан.
Ви пекер заз дуьз къведай тир,
Куьгьне кафан заз це, Руслан.

Чуьллер буш я, гуьл тахьайтIа,
Цуькведал билбил тахьайтIа,
МичIи сура гъил тахьайтIа,
Бубадив пел къаз це, Руслан.

Дуьнья

За ви дердер низ ахъайин,
Цуькведивди дигай дуьнья,
Ашкъиди кай Керемакай
Эслидиз пай тагай дуьнья?

Пашман я ви билбилдин ван,
Етимдин фу гьамиша яван,
Фагьум тийиз жегьил, жаван,
ЧIулав суруз ракъай дуьнья.

Вучиз я?

Кьисметар гай кьуьзуь фелек,
Ви дердер залан вучиз я?
Са дидеди нек гана хвей
Стхаяр душман вучиз я?

Гьар четинвал эхи авур,
Веледар хуьз чIехи авур,
ЧIулав чIарар рехи авур,
Дидеяр пашман вучиз я?