Кукваз булах

Цуьквер хьтин рушар гуьзел,
Гимиш кварар кьуна къуьнел,
Атана къе булахд кьилел,
Булахдин яд вуч ширин я!
«Девирдин къван» – Куквазбулах,
Вун туькIуьрай чанар сагъ хьуй!
А цикай квез хьурай панагь,
Азар-уьзуьр тергдай, яллагь!
Гьамга-гьамга земземдин яд
Мел-межлисда шуьрбет хьурай!
Мугьманри, акур цин дад,
Лезгистанда суьгьбет хьурай!
Гадани руш, ашкъи-гьевес,
И булахдал акваз хьурай!
ЧIагъан ягъиз, Ражабан сес
«Девирд къванце» акьаз хьурай!
Айиб мийир и булахдай
КIуф эцигна хъваз кIанда заз.
Гьар чкада за дамахдай,
Къвалав гичин гваз кIанда заз.
Мубарак квез, Кукваз жемят,
«Умуд» булах-земземдин яд!
Берекатар артух хьуй мад,
Беденар сагъ, рикIерни шад!