Кьурагь дагълар

«Элкъвей кьилер»,лекъвер-синер,
Кьурагь дагълар, Кьурагь дагълар.
Лагьуз тежер ава сирер,
Кьурагь дагълар, Кьурагь дагълар.
Алван-алван акъатна цуьк,
Шад жеда куьн акурла рикI.
Куьн ни бахтлу авуна икI,
Кьурагь дагълар, Кьурагь дагълар?
Ажеб иер аквазва куьн,
Нур ацалтна, Кьурагь дагълар.
Заз акI я, зав рахазва куьн,
Кьурагь дагълар, Кьурагь дагълар.
Заз чиз квехъ бул яшар ава.
Гьи дагълар квез ухшар ава?
Квехъ Гелхенар, Ашар ава,
Кьурагь дагълар, Кьурагь дагълар.
Гияр шегьер куь тарашнай,
Мурсал ханди куьн кармашнай.
Ашукь Саид квез тамашнай,
Кьурагь дагълар, Кьурагь дагълар.
Квехъ къе хатур-гьуьрмет ава,
Квехъ лап еке къимет ава,
Квехъ мални хеб, девлет ава,
Кьурагь дагълар, Кьурагь дагълар.
Кетин кьилни галаз къвалахъ,
КьепIир кьилихъ Кьелех булах
КIуф эцигна хъвада, валлагь,                                    
Кьурагь дагълар, Кьурагь дагълар.
Дагълар, дагълар, Кьурагь дагълар,
Дереярни я ви багълар.
Куь халкьарни я бахтавар,
Кьурагь дагълар, Кьурагь дагълар.