Хцин орден

Лянет хьайи къанлу дяве,
Авай са хва тунай рекье.
Акунач ам дидедиз мад,
Сагъ тежер хер туна рикIе.

ЯхцIур салай хтай орден
Дидед рикIин зенгер хьана.
Чи гъалибвал патал ада
Вичин чан гай сенгер хьана.

Диде чина берекат-нур,
Вилер мадни рекьеллама.
Ватандиз хьай къалханни тур,
Азиз къамат рикIеллама.

Эзберзава гьар са дуьадал:
– Дявекарар заз такIан я.
Терг хьуй дяве, чаз дуьнядал
Ислягь, бахтлу уьмуьр кIан я!