Хайи чил

Шалбуз дагъни Шагьдагъ я ви кьакьанвал ,
Акур гьар кас жедачни бес гьейран вал ?!
Веледри ви ийидач ваз дакIанвал!
АтIуда вал яргъи хьайи гьар са гъил ,
Чан зи ватан ,зи хайи эл , хайи чил !

Макан я вун чи бубайрин –лекьерин
Чпихъ тарих авай гьуьлер кьван дерин .
Алуд вуна чалай цифер дердерин ,
Шиир кхьиз шад жедайвал зи гуьгьуьл,
Чан зи ватан ,зи хайи эл, хайи чил !

Сур къатарай къвезава чаз сурагъ ви,
Гьажи Давуд , КIири буба - чирагъ ви.
Вахъ касвилин тарсар гайи Ярагъви,
Авайвиляй тик къазава чна кьил ,
Чан зи ватан, зи хайи эл, хайи чил!

Цуьк акъатна гуьлуьшан тир яйлахар,
Рагар падиз ргаз къвезвай булахар,
ТIебиатдин иервилер- дамахар,
Тух жедани килигунал ваз кьве вил,
Чан зи ватан, зи хайи эл, хайи чил !

Кьулан вацIу чан гъизава багъларал,
Зегьмет кIани гъилер ала саларал,
Гьар са чIавуз вили цав хьуй дагъларал,
Лепейривди лугьуз мани Каспи гьуьл,
Чан зи ватан ,зи хайи эл, хайи чил!