Давамда за

Къе са касди лагьана заз:
«Фагьум гана ша вун акъваз!
Низ лазим я ви  шиирар
Амачни ваз   ийидай  кар?
Хкадара  вуна чIалар
Аку кIвалах гъидай пулар,
Я кIан ятIа жен мецерал,
Кхихь вуна маса чIалал!»
Лагьана за: « Я бейниван,
ЧидачтIа ваз хьурай аян.
Зун патал туш а машгьурвал,
Ша тегьнеяр вегьимир зал.
Дидедин  чIал гьар са чIавуз
Са гъед я заз даим нур гуз: 
Экв гъизавай  зи вилериз,
Къуват гузвай зи гъилериз.
Ваз амани мад гаф хълагь!
Чешне я заз чIехи Далагь
Адан рехъ къе давамда за"
Хайи чилиз икрамда за!
Даим вине къаз чIал масан
Теснифда за ватан жуван!

Рубрика