Кьуьд я гада..

Эйваз
РикIел хквез жегьилвилер
Гъил алтадна кьилелай за
Ваз саламар рекъе твазва
Чпир хуьруьн пелелай за

Билал
Ви чан сагърай салам гайи
Заз Самурдин шавгьар гъайи
РикIел хкиз   Каспи хайи
Къачу илгьам гьуьлелай на

Эйваз
Гад гьарай я, кьуьдни кьарай
Гуьлуьт  алаз ярди храй
ЦIкан  тIуьна дидед  чрай
Жив михьзава гъенелай за

Билал
Пагь ,   ава хьи вун кефина
Чархи патар  живед кьуна
Са    пилтени   авач ина
Ракъура жив  хивелай на.

Эйваз
Хканава гъелерал чан
Алахьзава аялрин ван
Кьуьд   яIтани ваз хуьр акван!
ТIем къачузва чилелай за

Билал
Алудна на байихрин хъим
ХъутIуьн юкъуз  гъана заз чим
АцIанва жал СтIурин ким ?
Килиг Шагьдин синелай на

гьуьжетун Билал -Эйваз

Эйваз
Гьар мягьледай агатна эл
КватI жеда чун чIехи кимел
Чан шегьерви ,хъвез тахьуй хъел
ЦIар элкъуьрда хуьрелай за

Билал
Авани   куь пата мелер
ГъарикI я хьи къариб вилер
Шегьервидиз къведач хъилер
Алудмир зун кьилелай на

Эйваз
Шабрандин   кукI  кIвалин кьилив
Хьай хьанаваз сад я чилив
Куьнуьдин кул и кьве гъилив
Хчур тир а хелелай за

Билал
Къе пака я жез гьуьнуьяр
Гваз хкведа зун цуьнуьяр
Векь ядалди а куьнуьяр
Алуд мийир вилелай  на..

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.