Чан эцигда за...

ЦIай авайди я даим рикIе зи,
МефтIеда тIурфан авайди я зи.
Гъетеркай я экуь диде зи,
Буба гарарал алайди я зи.

Мягькем cа кIус я зун чи Шагь дагъдин,
Кьилел, девлет хьиз, даим жив алай.
Ширин мани я къайи булахдин,
Яйлах я къацу, юкьвал шив алай.

Зун хьтин вад виш агъзур кас ава,
Лезги хуьрерин тIвар, абур хуьзвай.
Вад виш агъзурни диде-свас ава,
Гьар са кIвале кьеб, цIай, сабур хуьзвай.

Ни лугьузва бес авач Лезгистан,
Авач лезги халкь, авач лезги чIал?
Гьамишалух я зунни зи Ватан,
Амма гьахьнава рикIе цIийи тIал:

Кьве пад авунва, зи халкьни зи чил,
Гъил эцигиз кIанз лезги хуьрерал.
Къуьл цайи чIавуз экъечIзава сил,
Квахьна берекат вири никIерай...

ЦIай авайди я даим зи рикIе,
Гьисс тийиз хайи чилел кьуьдни гад.
Чан эцигда за зи халкьдин рекье,
Тежедайвал мад и падни а пад.