Фана дуьнья

Танда ифин-чим гьатзавач,
Рагъ таквадай къузадик кваз.
Кьин тавуна чан алама,
Югъди-йифди сузадик кваз.

Фана дуьнья, тади я заз,
Мус квахьда ви хажалат-гъам?!
Ругъвалрив ви фитIиниз таз,
Кьурурзава зи рикIин дам.

Кьурадач мез, зи рикIин гаф,
Цавар-чилер ханалди зал.
Кьуру жеч гьич гьуьлуьн ял-каф,
Гъиз экъичиз капалди цIал.

Къваздач хьи динж зур гвай гъилер,
Гатаз цав-чил икI датIана.
Фана дуьнья, ви дердери
Гъанид хцин рикI атIана.