Билбил

Хуш яни ваз къацу тамар,
Кьуна мескен гьана, билбил?
Цуьквед вилик ийиз шелар,
Хьайла зи рикI кана, билбил?

Гатфар чIавуз меген ви кар,
Агь-зар яни йифер-йикъар?!
Авадариз вилин накъвар,
Ви рикI гьида хана, билбил?

Ашукьвиле якъин ви тай,
Первана жед шеминал кай.
Зазни тIимил кьисметди пай
Ви дердинкай гана, билбил.

Гатфар фена, атайла гад,
Мийир вуна эсла феряд.
Фена Нури хуьз кьил цIи мад
Ахквад чаз чун сана, билбил!