Гьуьрият хупI хъсан затI я,
Эллериз къадир хьайитIа,
Дугъриданни масан затI я,
Муьштеридиз чир хьайитIа
Фагьумнамаз бязи крар –
Гагь жеда им чергес пурар,
Эвелдай хьайи гьа икьрар
ГьикIда бес таъхир хьайитIа?
Керекул хьиз – «къвед я» лугьуз,
ЧIулав гъуьлягъ «гъед я» лугьуз,
Ранг акурла, «мед я» лугьуз,
Четин я чехир хьайитIа.
МичIериз «эквер я» лугьуз,
Верчериз «кIекер я» лугьуз,
Яргъалай «миргер я» лугьуз.
ГьикIда чеб ламар хьайитIа?
Са карни туькIуьр тежедай.
ЦайитIани дуьгуь тежедай.
Инсандивай гуьз тежедай,
ГьикIда чIуру хир хьайитIа?
Гьардаз вичин эксик, герек
Течиз, мецер хьана зирек.
Наши ашпазд авур хуьрек
ГьикIда бес пехир хьайитIа?
Чаз «им хъсан гьал я» лугьуз,
Гагь «вирт авай цел я» лугьуз,
«Цирав хпен кIел я» лугьуз,
ГьикIда катдай къуьр хьайитIа?
Хъсан яз къалаз эвелдай
Акъудна чун авай гьалдай.
Дуьнья гьарда вичихъ ялдай
ГьикIда патахъ кIир хьайитIа?
«Им хъсан гьава я» лугьуз,
«Дердиниз дава я» лугьуз,
«Вчи ширин гьалва я» дугьуз,
ГьикIда чIулав къир хьайитIа?
Сулеймана икI лагьана,
Бязибурун кефи хьана.
ИкI жавабдар вун рахана,
ГьикIда вал тахсир хьайитIа?
Добавить комментарий