Билбил

Акьахьна са кьакьан тарциз
Бегьер гудай ичин, билбил.
Вуч чIал ава а ви ванциз,
Гьарайиз я кIвачин, билбил.

Мягькем кьуна вуна и тар,
Тамам ян бес амай шартIар?
Саймиш тийиз чи жемятар,
ХупI къенида ви чан, билбил.

Гьич чIал авач ви гьалариз,
Дамахзава на эллериз.
Аквадачир вун вилериз,
Вяде тиртIа хъуьтIуьн, билбил.

Заз чир жед вун ятIа къуччагъ:
Зун акурла жемир къачагъ.
ЦIи гьикI тир ви дуланажагъ,
Тух яни ваз, гишин, билбил?

ЦIинин къуьдни хьана пайгар,
Дегиш хьанач мад ви рангар.
Гила хибни хьана азгар,
Йикъар фена чишин, билбил.

Жугъура ваз са кIеви рук,
Гьалт тавурай вал чинерук.
АкатайтIа адан хурук,
Ахпа за ваз вучин, билбил?

Жагъура ваз чка секин,
Ша жемир вун акьван эркин.
Заз акурд туш вун кьван йигин
Грамофон машин, билбил.

Хьана къвазмир вун икI таъхир,
Пашман жедай кар я эхир.
Кьвед-кьвед хьана гьар са ничхир,
Къайгъудик ква чпин, билбил.

ГьакI нубатсуз ийимир къал,
Гатфар кьведа сад-вад йикъал.
Сулейманан ша вун иукьвал,
Са кIус ваз тамашин, билбил.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.