Пехърени вич катрай кьада

Бязи гьайван вич вичелай 
Фи да, я сабур тийижиз;
Алатна залпан тIишелай, 
Итимвал, абур тийижиз.

Чил вегьида кьуру гьуьлуьз,
Са затI текъвез вичин гъилиз.
Марфад яд атай хулиз,
Гуьргенни, Санбур тийижиз.

Гьар ахмакьдихъ жед а са хух,—
ГьикI рахада — адав рахух! 
Даим вичиз нагъварни мух
Кутадай ахур тийижиз.

Вичин крар хьайла дуьзмиш, 
Гъейрибур тежез бегенмиш, 
Пин жунгав хьиз хьана къизмиш,
Вичиз тфенг, тур тийижиз.

Гафунал кIан, я кIукI текъвер,
Сивяй чикIиз гьар патахъ гъер, 
РикIиз кIанда виртни дуьдгъвер, 
Вичин хуьрек шур тийижиз.

Я гьахъ, гьисаб, мизан терез 
Течиз, гъейрибурал хьуьрез. 
Иеси кьей кьуртIи вечрез
Вич ацукьдай кьур тийижиз.