Къизилгуьл

Дамах-чагъ гваз физ, виликай алатиз,
Чанда гьикьван цIай твада на, Къизилгуьл?
Шем-чирагъ хьиз, хквез, рикIив агатиз,
Чанда гьикьван цIай твада на, Къизилгуьл?

Цуьк ахъагъай шумал беден чIагуриз,
Тер къекъведай къвед хьана, жув къалуриз,
Зай хьайи рикI пияладив ацIуриз,
Чанда гьикьван цIай твада на Къизилгуьл?

Рагъ кIевириз, дуьнья на заз дар ийиз,
Зар-зибаяр вавди кьаз, инкар ийиз,
Заз чигедин марфадикай хар ийиз
Чанда гьикьван цIай твада на Къизилгуьл?

Катра ериш, ашкъи хура амачиз,
Сирдаш хьана, са дил жаваб авачиз,
Перванадин ихтибарвал алачиз,
Чанда гьикьван цIай твада на Къизилгуьл?

Магьидин тан, нехиш атIай чIурар гваз,
Некьид пIузар, нуьгвед ичер хурар гваз,
ЧIилихъвидин ивидин шагь дамар гваз,
Чанда гьикьван цIай твада на Къизилгуьл?