Вун бахтунин рекье хьухь

Къекъвезвайдаз жагъида гьахъ,
Вун бахтунин рекье хьухь.
ТахьайтIани девлет жувахъ,
Вун бахтунин рекье хьухь.

Къизил авай араб халиф,
Ахвар тийиз са югъ, са йиф,
Кьуразвалда рикIеваз циф.
Вун бахтунин рекье хьухь.

Тарашчияр ава шумуд,
Девлетрик кваз вири умуд.
Къизил кIватIиз жемир кубут,
Вун бахтунин рекье хьухь.

Квез я эхир лали-гевгьер,
Авайла вахъ ярдин кифер?
Югъур хьуй ваз физвай сефер,
Вун бахтунин рекье хьухь.

Катран кьве вил гуьгъунаваз
Дуьньядин чил куьткуьна ваз.
Ашкъидин цIай гуьнгуьнамаз
Вун бахтунин рекье хьухь.

Инсанри ви кьабулрай гаф,
Винел са чIар алачир хаф,
Уьмуьр акваз тахьуй гзаф,
Вун бахтунин рекье хьухь.

Куьре Мелик, шегьерни хуьр
Жув къекъвезвай ая на чир.
Садазни ви рехъ тахьуй сир,
Вун бахтунин рекье хьухь.